Pune News : २०१४ मध्ये आंबेगाव तालुक्यातील माळीण येथील दरड कोसळण्याची दुर्घटना घडली.
त्यानंतर केंद्राच्या भूजल सर्वेक्षण व विकास यंत्रणा (जीएसडीए) आणि भारतीय भूवैज्ञानिक सर्वेक्षण (जीएसआय) या सरकारी यंत्रणांनी केलेल्या सर्वेक्षणातून जिल्ह्यात २३ गावांना दरडींचा धोका असल्याचे समोर आले होते.
जीएसआयने यंदाच्या वर्षी नव्याने सर्वेक्षण केल्यानंतर या दरडप्रवण गावांची संख्या ७२ पर्यंत गेली आहे. यातील दोन गावांचे तातडीने पुनर्वसन करण्याचे सर्वेक्षण अहवालात स्पष्ट केले असून, उर्वरित ७० गावांमध्ये सुरक्षात्मक उपाययोजना राबविण्याचे सुचविण्यात आले आहे.
त्यानुसार जिल्हा आपत्ती व्यवस्थापन विभागाकडून सार्वजनिक बांधकाम विभागाला (पीडब्ल्यूडी) ३० ऑक्टोबरपर्यंत दरड प्रतिबंधात्मक उपाययोजनेंतर्गत केलेल्या कामांचा अहवाल तयार करण्याचे आदेश दिले आहेत.
हा अहवाल जिल्हा प्रशासनाला प्राप्त होताच, नोव्हेंबर महिन्याच्या पहिल्या आठवड्यात राज्य शासनाकडे पाठविण्यात येणार आहे.
त्यानंतर पुढील उपाययोजना करण्यात येणार असल्याची माहिती जिल्हा प्रशासनाकडून देण्यात आली.
पुणे जिल्ह्यातील माळीण दुर्घटना घडलेल्या आंबेगाव तालुक्यातच सर्वाधिक २३ गावे दरडप्रवण असल्याचे जीएसआयच्या सर्व्हेक्षणात समोर आले आहे.
त्यापाठोपाठ मावळ तालुक्यात १५, वेल्हे तालुक्यात १०, मुळशी ८, खेड ६, जुन्नर आणि भोर तालुक्यात प्रत्येकी ५ अशी एकूण ७ तालुक्यांतील ७२ गावे दरडप्रवण क्षेत्रात असल्याचे जीएसआयने म्हटले केलेल्या सर्व्हेक्षणात आहे.
२०२०मध्ये झालेल्या जीएसआयच्या सर्वेक्षणातील २३ गावांपैकी २० गावांचा समावेश असून, यातील मुळशी तालुक्यातील घुटके आणि भोर तालुक्यातील धानवली या गावांचे तातडीने स्थलांतर करण्याचे सर्वेक्षण अहवालात समोर आले आहे.
उर्वरित ७० गावांत दरड प्रतिबंधात्मक उपाययजोनांची म्हणजे संरक्षक भिंत बांधणे, पाण्याचा प्रवाह काढणे,
झाडे लावणे किंवा तात्पुरत्या स्थलांतरासाठी पर्यायी व्यवस्था उभी करणे, अशी अनेक कामे सुचविण्यात आली आहेत.
त्यासाठी दरडप्रवण ७० गावांमधील : ‘सुरक्षात्मक, प्रतिबंधात्मक उपाययोजनांची तपासणी करून प्रस्ताव पाठविण्याचे आदेश सार्वजनिक बांधकाम विभागाला देण्यात आले आहेत.
त्यानुसार पीडब्ल्यूडीने आतापर्यंत ३५ गावांतील कामाचे प्रस्ताव पाठविले असून मागील २३ गावांपैकी अनेक गावांत प्रतिबंधात्मक कामेदेखील पूर्ण केल्याची माहिती जिल्हा आपत्ती व्यवस्थापन विभागाचे अधिकारी विठ्ठल बनोटे यांनी दिली.
तालुकानिहाय दरडप्रवण गावांची नावे
●आंबेगाव : काळेवाडी एक, काळेवाडी दोन, जांभळेवाडी, पांचाळे खु., भगतवाडी खु., तळपेवाडी, सारवली, आवळेवाडी, आसाणे, कुसरे खु., अडिवरे, काळवाडी, आंबरे, कुसरे बु., पासरवाडी, बोरघर, मेघोली, दिगड, बेंडारवाडी, साकेरी, कोलतावडे, दरेवाडी.
● मावळ: मालेवाडी, सांगिसे, लोहगड, वाडेश्वर, वाऊंड, ताजे, शिलाटणे, कलकराय, फलाने, वेहेरवाडी, बोरज, भुशी, कुसावली, मोरमारेवाडी.
● वेल्हे : टेकपोळे, आंबवणे, सिंगापूर, गर्जेवाडी, घोळ, गिवशी, मानगाव, धनगरवाडी, वाडघर, हरपूड.
●मुळशी : घुटके, गडले, विठ्ठलवाडी, हिवाळेवस्ती, वाजरकरवाडी, साई, झाडाचीवाडी, कलमशेत.
●खेड: नायफड, शेंद्रेवाडी, गडाद, सोनारवाडी, शिरगाव, गडदवाडी.
●भोर: धानवली, डेहणे, सोनारवाडी, नानावळे, जांभळेवाडी.
●जुन्नर : भिवडे खु., भिवडे बु., सोनावळे, हातवीज, गंगाळधरे.
